Facebook កំពុង​ធ្វើ​ឲ្យ​ពិភពលោក​ភ្ញាក់ផ្អើល​ម្ដងទៀត​ហើយ!

Facebook កំពុង​ពិភាក្សា​ចរចា​ទិញ​ក្រុមហ៊ុន Titan Aerospace ដែល​ជា​ក្រុមហ៊ុន​ផលិត​យន្តហោះ​គ្មាន​មនុស្ស​បើក​បរ​ដើរ​ដោយ​ថាមពល​ព្រះអាទិត្យ​ដែល​អាច​​ហោះ​លើ​អាកាស​បាន​ដល់​ទៅ ៥ ឆ្នាំ​ឯណោះ​ក្នុង​មួយ​លើក។ នេះ​បើ​យោង​តាម​ប្រភព​ពី​គេហទំព័រ Techcrunch។

បណ្ដាញ​សង្គម​យក្ស​ដែល​ទើប​តែ​ទិញ​បាន WhatsApp នេះ ចង់​បាន​យន្តហោះ​គ្មាន​មនុស្ស​បើកបរ​ដើរ​ដោយ​ថាមពល​ព្រះអាទិត្យ​ដើម្បី​ផ្ដល់​សេវា​អ៊ីនធឺណិត​ដែល​មាន​មូលដ្ឋាន​លើ​មេឃ និង​ផ្ដល់​សេវា​ទិន្នន័យ។ បើ​ចរចា​បាន​សម្រេច Facebook នឹង​ដំណើរ​នៅ​ទ្វីប​អាហ្វ្រិក​មុន​គេ។ ខាង​ក្រុមហ៊ុន Titan Aerospace ក៏​បាន​អះអាង​ថា ខ្លួន​កំពុង​ចរចា​ជា​មួយ Facebook ដែរ។

គម្រោង​មួយ​នេះ​នឹង​ជួយ​ដល់ Internet.org របស់ Facebook ក្នុង​ការ​ពង្រីក​លទ្ធភាព​ទទួល​បាន​អ៊ីនធឺណិត​ប្រើប្រាស់​នៅ​តាម​បណ្ដា​ប្រទេស​កំពុង​អភិវឌ្ឍន៍។ តាម​ការ​រាយការណ៍​ថា Facebook នឹង​ទិញ​ក្រុមហ៊ុន Titan Aerospace ក្នុង​តម្លៃ ៦០ លាន​ដុល្លារ ដែល​នេះ​គឺ​ថោក​ជាង WhatsApp ឆ្ងាយ (១៩ ពាន់​លាន​ដុល្លារ)។

ឯ​ក្រុមហ៊ុន Google ​ក៏​មិន​អន់​ដែរ គឺ​កំពុង​សាកល្បង​លើ​ការ​ផ្ដល់​សេវាកម្ម​អ៊ីនធឺណិត​មាន​មូលដ្ឋាន​លើ​មេឃ​ផង​ដែរ ដោយ​ប្រើប្រាស់​បាឡុង​ដើរ​ដោយ​ថាមពល​ព្រះអាទិត្យ។ Google កំពុង​ធ្វើ​តេស្ត​សាកល្បង​នៅ​អឌ្ឍគោល​ខាង​ត្បូង នៅ​ប្រទេស​នូវែលហ្សេឡង់ ៕

ទស្សនា​ឃ្លិប​ពី​យន្តហោះ​គ្មាន​មនុស្ស​បើកបរ​ដើរ​ដោយ​ថាមពល​ព្រះអាទិត្យ៖

ប្រភពពីhttp://news.sabay.com.kh/