ចេញ​កាលបរិច្ឆេទ Apple ប្រកាស iPhone 6 ជា​មួយ​លក្ខណៈ​សម្បត្តិ​ថ្មី​ចំនួន ៥

ថ្ងៃ​ចាប់​បដិសន្ធិ iPhone 6 ត្រូវ​គេ​រំពឹង​ថា​នឹង​ចេញ​ចំ​ព្រឹត្តិការណ៍​សន្និសីទ​អ្នក​អភិវឌ្ឍ​កម្មវិធី​ទូទាំង​ពិភពលោក​ហៅ​កាត់​ថា WWDC 2014 ដែល​នឹង​ធ្វើ​ឡើង​ក្នុង​ខែ​មិថុនា​ខាង​មុខ​នេះ​ហើយ។ អ្នក​ជំនាញ​វិភាគ​ជនជាតិ​ចិន​ម្នាក់ Sun Changxu បាន​ប្រាប់​ដល់​សារព័ត៌មាន​ចិន QQ Tech ថា នាង​មាន​ជំនឿ​ចិត្ត​ទាយ​ទុក​មុន​ថា ចង្វាក់​ផលិតកម្ម​ iPhone 6 ចុង​ក្រោយ​គឺ​នៅ​ខែ​ឧសភា ហើយ​បន្ទាប់​ពី​បាន ១ខែ​នឹង​បញ្ចប់​ជា​ស្ថាពរ​គឺ​ខែ​មិថុនា​ល្មម​ចំ​ពេល​សន្និសីទ WWDC។

សារព័ត៌មាន QQ Tech របស់​ចិន​នេះ​បាន​ឱ្យ​ដឹង​ទៀត​ថា iPhone 6 នឹង​ចេញ​ផ្លូវការ​ដោយ​មាន​អេក្រង់ ២ទំហំ​ផ្សេង​គ្នា​ដែល​មួយ​ជា Smartphone ដដែល​ទំហំ ៤,៧អ៊ីញ (1136 x640px) និង​មួយ​ទៀត​ជា Phablet ទំហំ ៥,៧អ៊ីញ។ ខាង​ក្រោម​នេះ គឺ​ជា​លក្ខណៈ​សម្បត្តិ​ថ្មី​ចំនួន៥ នៅ​លើ iPhone 6៖

១. អេក្រង់ធំ​ជាង​មុន៖ គ្រប់គ្នា​មិន​ថា អន្តរជាតិ ឬ​ប្រជាជន​កម្ពុជា​ទេ​គឺ​សុទ្ធតែ​សង្ឃឹម​ភាគរយ​ច្រើន​ថា iPhone ចេញ​ថ្មី​ឆ្នាំ​នេះ នឹង​មាន​អេក្រង់​ធំ​ជាង​មុន ​ព្រោះ​អតិថិជន​ច្រើន​មាន​តម្រូវការ​លើ​អេក្រង់​ធំ​ងាយ​ស្រួល​ប្រើប្រាស់។ Smartphone ក្រុមហ៊ុន​ដទៃ​កំពុង​ពង្រីក​កាន់​តែ​ធំ​ឡើងៗ ជាក់​ស្ដែង​ដៃ​គូ​ប្រជែង Apple គឺ Samsung បាន​ពង្រីក​ស៊េរី Galaxy S ចាប់​តាំង​ពី GS ជំនាន់​ទី១ (Galaxy S) អេក្រង់ ៤អ៊ីញ Galaxy SII ទំហំ ៤,៣អ៊ីញ Galaxy SIII ៤,៨អ៊ីញ S4 មាន​ទំហំ ៥អ៊ីញ និង Galaxy S5 ជំនាន់​ចុង​ក្រោយ​ពង្រីក​ដល់​ទំហំ ៥,១អ៊ីញ។ ដូច្នេះ​អេក្រង់ ៤,៧អ៊ីញ និង ៥,៧អ៊ីញ​ប្រហែល​អាច​ទៅ​រួច ។

២. បំពាក់ Chip A8 Processor៖ លក្ខណៈ​សម្បត្តិ​មួយ​ទៀត​ទៅ​លើ​បន្ទះ chip ប្រភេទ​ថ្មី A8 Processor ដែល​ត្រូវ​បាន​ក្រុមហ៊ុន​អភិវឌ្ឍ​បន្ត​ពី chip Apple A7 ដែល​បាន​បំពាក់​លើ iPhone 5S រួច​មក​ហើយ។ Chip ថ្មី​នឹង​រឹតតែ​មាន​ល្បឿន​ដំណើរការ​ល្អ​ប្រសើរ​ថែម​ទៀត។

រូប screenshort របស់ iOS 8

៣. ប្រព័ន្ធ​ប្រតិបត្តិការ iOS 8៖ និយាយ​លើ Software ម្ដង​ដែល​ប្រព័ន្ធ​ប្រតិបត្តិការ iOS 8 នេះ​ត្រូវ​រំពឹង​ថា នឹង​ភ្ជាប់​មុខងារ​ថ្មីៗ​ពិសេសៗ​ជា​អត្ថប្រយោជន៍​ចំពោះ​សុខភាព ដូច​ជា Healthbook សម្រាប់​ត្រួត​ពិនិត្យ​សម្ពាធ​ឈាម និង update លើ​សេវាកម្ម​ផែនទី​ដូច​ជា BroadMap, Embark និង HopStop ជា​ដើម ។

៤. បច្ចេកវិទ្យា​ស្កេន​ប្រស្រី​ភ្នែក៖ iPhone 5S ត្រូវ​បាន​បំពាក់​មុខងារ TouchID រួច​មក​ហើយ រីឯ iPhone 6 ដែល​ក្រុមហ៊ុន​ត្រៀម​ចេញ​ឆ្នាំ​នេះ​វិញ ក៏​នឹង​មាន​ដូច​គ្នា តែ​នឹង​ត្រូវ​ក្រុមហ៊ុន​អភិវឌ្ឍ​សមត្ថភាព​កាន់​តែ​ពិសេស​ថែម​ទៀត។ អ្វី​ដែល​អស្ចារ្យ​ជាង​នេះ​ទៀត​នោះ គេ​រំពឹង​ថា iPhone ជំនាន់​ទី៨ នឹង​មាន​មុខងារ​ស្កេន​ភ្នែក ។

៥. បច្ចេកវិទ្យា​ផ្ទេរ​ទិន្នន័យ​រហ័ស NFC៖ ជុំវិញ​បច្ចេកវិទ្យា Near Field Communication ដែល​ហៅ​កាត់​ថា NFC នេះ​ត្រូវ​បណ្ដា​សាធារណជន​ធ្លាប់​រំពឹង​ថា ក្រុមហ៊ុន​នឹង​បំពាក់​លើ iPhone 5 ម្ល៉េះ។ តែ​ត្រូវ​បាន​ចាំបាត់ៗ​រហូត​ដល់ iPhone 5S/5C ហើយ នៅ​តែ​មិន​ទាន់​ឃើញ​មាន។ ដោយ​ឡែក iPhone 6 កាន់​តែ​មាន​ជំនឿ​មុតមាំ​ជាង​មុន​ថែម​ទៀត។

ចុះ​សមត្ថភាព​កាមេរ៉ា ហើយ​និង​បច្ចេកវិទ្យា​សាក​ថ្ម​ឥត​ខ្សែ​អី​នោះ នឹង​មាន​ដែរ​ឬ​ទេ? សារព័ត៌មាន​ចិន IT168 កាល​ពី​ថ្មីៗ​នេះ​អះអាង​ថា iPhone 6 យ៉ាង​ហោច​ក៏​ត្រូវ​បាន Apple បន្ថែម​សមត្ថភាព​ខ្ពស់​ជាង iPhone 5S ទៅ​ទៀត​ជា​មួយ​ទំហំ​កាមេរ៉ា​ធំ​ជាង​មុន​ពោល​គឺ 10MP និង​មាន f/1.8 គុណភាព​លើស narrower f/2.2 ដែល​មាន​នៅ​លើ​កាមេរ៉ា iPhone 5S ។

ប្រភពពីhttp://news.sabay.com.kh/