BlackBerry ចាប់​ដៃ Foxconn ឱ្យ​ផលិត Hardware ដល់​ខ្លួន

BlackBerry ខណៈ​ដែល​កំពុង​ប្រកាស​បញ្ជី​សារពើពន្ធ​ប្រចាំ​ត្រីមាស​ទី៣ ឆ្នាំ២០១៣ ថ្មីៗ​នេះ ក៏​បាន​អះអាង​ជា​សាធារណៈ​នូវ​គម្រោង​នឹង​បន្ត​បញ្ចេញ Smartphone ស៊េរី​ថ្មីៗ​នៅ​ពេល​ខាង​មុខ​ដោយ​ចាប់​ដៃ​សហការ​ជា​មួយ​ Foxconn រយៈពេល ៥ឆ្នាំ​ទៅ​មុខ។

Smartphone ស៊េរី​ថ្មី​នឹង​ចរាចរ​លើ​ទីផ្សារ​ជា​មួយ​ប្រព័ន្ធ​ប្រតិបត្តិការ BlackBerry 10 ក្រោម​លេខ​កូដ Jakarta។ លោក John Chen នាយក​ប្រតិបត្តិ​របស់ BlackBerry បាន​អះអាង​នៅ​ថ្ងៃ​នេះ​ថា device ថ្មី​នឹង​ត្រូវ​ប្រកាស​ចេញ​ផ្លូវការ​នៅ​អំឡុង​ខែ​មីនា ឬ​មេសា ក្នុង​ឆ្នាំ២០១៤ ក្រោយ​នេះ នៅ​ក្នុង​ប្រទេស​ឥណ្ឌូណេស៊ី​ដំបូង។ នេះ​បើ​យោង​តាម​សេចក្ដី​រាយការណ៍​ពី​សារព័ត៌មាន n4bb។ ពុំ​មាន​ព័ត៌មាន​លំអិត​ពី​លក្ខណៈ​សម្បត្តិ​របស់ device ថ្មី​នេះ​នៅ​ឡើយ។ លោក Chen អះអាង​ថា BlackBerry នឹង​ផ្ដោត​ខ្លាំង​លើ​ការ​អភិវឌ្ឍន៍​ផ្នែក Software រីឯ​ផ្នែក Hardware គឺ​ក្រុមហ៊ុន Foxconn ជា​អ្នក​ទទួល​បន្ទុក។ គួរ​បញ្ជាក់​ដែរ​ថា ក្រុមហ៊ុន Foxconn ក៏​ជា​ដៃ​គូ​ សហការ​យ៉ាង​ជិត​ស្និត​របស់ Apple ដែល​បាន​ទទួល​បន្ទុក​ក្នុង​ការ​ដំឡើង iPhone៕