RSS Feed
Twitter
Thursday, December 26, 2013
Unknown
ឆ្នាំ ២០០២ ពលរដ្ឋកម្ពុជាមានការចាប់អារម្មណ៍យ៉ាងខ្លាំង នៅពេលដែលរថយន្តស្នាដៃកូនខ្មែរដំបូងបានលេចរូបរាងគួរឲ្យភ្ញាក់ផ្អើល។ អង្គរ ២០០៣ ជាឈ្មោះដែលគេប្រសិទ្ធិនាមហៅរថយន្តដំបូងរបស់ខ្មែរ ដែលបង្កើតឡើងក្រោមគំនិតច្នៃប្រឌិតរបស់កូនខ្មែរមួយរូបគឺលោក ញាន ផល្លិក។
ពលរដ្ឋកម្ពុជាមិនដែលនឹកស្មានថា កូនខ្មែរអាចមានសមត្ថភាពផលិតរថយន្តបានដោយខ្លួនឯងនោះ ទេ ទោះបីវានៅមិនទាន់មានភាពទំនើបដូចរថយន្តនាំចូលក៏ដោយ។ ប៉ុន្តែនេះអាចចាត់ទុកថាជាការបោះជំហានមួយដ៏សំខាន់ សម្រាប់ការអភិវឌ្ឍឧស្សាហកម្មរថយន្តនៅក្នុងប្រទេសកម្ពុជា។
ក្រោយការបញ្ចេញរថយន្តអង្គរស៊េរីដំបូង ២០០៣ រថយន្តអង្គរស៊េរី ២០០៤ ក៏បានបង្ហាញរូបរាង។ ប៉ុន្តែអ្វីគួរឲ្យចាប់អារម្មណ៍ខ្លាំងគឺម៉ូដែលអង្គរ ២០១០ ដែលជារថយន្តអង្គរជំនាន់ទី ៣ ត្រូវបានគេអភិវឌ្ឍកាន់តែទំនើប។ ទំនើបត្រង់ថា រថយន្តនេះមិនប្រើកូនសោទេគឺប្រើកាតស៊កបញ្ចូលដើម្បីបញ្ឆេះ។ ទ្វារថយន្តទៀតសោត បញ្ជាដោយប្រើសំឡេង ហើយដំបូលអាចលើកចុះឡើងបានដោយស្វ័យប្រវត្តិ។ អ្វីដែលកាន់ប្លែកនោះត្រង់ថា រថយន្តអង្គរម៉ូដែល ២០១០ នេះអាចស្ដាប់តន្ត្រីដោយតភ្ជាប់ជាមួយទូរសព្ទដៃយ៉ាងអស្ចារ្យថែមទៀតផង។
រហូតដល់ឆ្នាំ ២០១៣ រថយន្តអង្គរម៉ូដែលថ្មីមួយទៀតគឺ «អង្គរ EV ២០១៣» ក៏ត្រូវបើកសម្ពោធនិងបង្ហាញរូបរាងយ៉ាងឧឡារិក ក្រោមការចូលរួមសាទរពីពលរដ្ឋខ្មែរនិងភ្ញៀវជាតិនិងអន្តរជាតិយ៉ាងច្រើនកុះករ។
«អង្គរ EV ២០១៣» ពិសេសទាំងរូបរាងនិងបច្ចេកវិទ្យា។ អង្គរ EV (Electronic Vihecle) ២០១៣ ជាប្រភេទរថយន្តមិនប្រើប្រេងឥន្ធនៈ ដំណើរការដោយថាមពលអគ្គិសនី។ រថយន្តដ៏ទំនើបស៊េរីថ្មីនេះ មានសមត្ថភាពមិនចាញ់រថយន្តទំនើបនាំចូលពីបរទេសមួយចំនួននោះទេ។
កន្លងទៅលោក ញាន ផល្លឹកបានបញ្ជាក់ថា មូលហេតុដែលលោកមានគំនិតចង់បង្កើតរថយន្តអង្គរនេះឡើង គឺដើម្បីទុកស្នាដៃទាំងនេះដល់កូនខ្មែរជំនាន់ក្រោយ និងដើម្បីបង្ហាញពិភពលោកថាកូនខ្មែរមានសមត្ថភាពអាចផលិតរថយន្តបានដោយខ្លួនឯង តាមធនធានកម្រដែលខ្លួនមានមិនឲ្យចាញ់បរទេសនោះទេ។ ការណ៍មានរថយន្តផលិតក្នុងស្រុកលើកដំបូងនេះ ក៏អាចជួយជំរុញនិងបំផុសដល់ការអភិវឌ្ឍវិស័យរថយន្តនៅក្នុងប្រទេសកម្ពុជា ឲ្យកាន់តែមានភាពរីកចម្រើនថែមទៀតនាពេលអនាគត។
ជាមួយការសម្រេចបានសមិទ្ធផលដ៏គួរឲ្យកោតសរសើរនេះ ស្នាដៃផលិតរថយន្តរបស់លោកនេះត្រូវបានគេទទួលស្គាល់ទាំងកម្រិតជាតិ និងអន្តរជាតិ ហើយបណ្តាញសារព័ត៌មានធំៗនៅលើសាកលលោកក៏បានចាប់អារម្មណ៍ និងយកមកចុះផ្សាយព័ត៌មានជាហូរហែ។
កាន់តែអស្ចារ្យថែមទៀត ថ្មីៗនេះ ស្ថាបនិករថយន្តអង្គរលោក ញាន ផល្លឹកបានបង្ហើបឲ្យដឹងថា នៅដើមឆ្នាំ ២០១៤ រថយន្តអង្គរម៉ូដែលថ្មីមួយទៀត នឹងលេចរូបរាងជាមួយការ Update រូបរាងនិងការបំពាក់បច្ចេកវិទ្យាកាន់តែទំនើប សម្រាប់បង្ហាញដល់សាធារណជន។
ប្រភពពីៈhttp://news.sabay.com.kh
Posted in 
.jpg)
0 comments:
Post a Comment