RSS Feed
Twitter
Tuesday, December 24, 2013
Unknown
អ្នកចាត់ការក្រុមតោខៀវ Chelsea លោក Jose Mourinho កំពុងរៀបចំផែនការនៅដឹកនាំក្រុមជើងឯកលីកកំពូលអង់គ្លេស៤សម័យកាលនេះរយៈពេល១២ឆ្នាំ។
បន្ទាប់ពីកាន់តំណែងនៅ Stamford Bridge ពីឆ្នាំ២០០៤ដល់២០០៧ គ្រូបង្វឹកសញ្ជាតិព័រទុយហ្គាល់វ័យ៥០ឆ្នាំរូបនេះបានវិលមកដឹកនាំ Chelsea ជាលើកទី២កាលពីខែមិថុនាឆ្នាំ២០១៣នេះក្រោមកិច្ចសន្យារយៈពេល៤ឆ្នាំ ក្រោយពេលឈ្នះពានជាច្រើនជាមួយ Inter Milan នៅអ៊ីតាលីនិងដឹកនាំ Real Madrid នៅអេស្ប៉ាញ។
និយាយអំពីកិច្ចសន្យារបស់ខ្លួននៅថ្ងៃចន្ទម្សិលមិញ អតីតអ្នកចាត់ការក្រុម FC Porto រូបនេះត្រូវគេស្រង់សម្ដីថា៖ “និយាយឱ្យចំទៅ ខ្ញុំសង្ឃឹមថានៅទីបញ្ចប់នៃ៤ឆ្នាំនោះ(កិច្ចសន្យា) ពួកយើងអង្គុយជាមួយគ្នានិងវិភាគពីស្ថានភាពហើយឈានដល់ចំណុចរួមមួយដែលក្លិបនិងខ្ញុំរីករាយនឹងបន្តធ្វើការជាមួយគ្នាឬសប្បាយចិត្តនឹងចែកផ្លូវគ្នាដើរ។ ប៉ុន្តែខ្ញុំចង់និយាយថាខ្ញុំចង់ដឹកនាំក្រុមរយៈពេល១២ឆ្នាំ។ ខែក្រោយ(មករា២០១៤) វ័យរបស់ខ្ញុំកើនដល់៥១ឆ្នាំហើយ ដូច្នេះបន្ទាប់ពីដឹកនាំ Chelsea ១២ឆ្នាំរួច ខ្ញុំនឹងប្ដូរទៅដឹកនាំក្រុមជម្រើសជាតិវិញម្ដងដើម្បីទៅលេង World Cup។ ព័រទុយហ្គាល់ជាជម្រើសទី១របស់ខ្ញុំ ឯអង់គ្លេសជាក្រុមជម្រើសជាតិទី២ដែលខ្ញុំចង់បង្វឹក”។
លោកបន្ថែមថាការណ៍ដែលលោកត្រលប់មក Chelsea វិញមិនមែនដោយសារលុយនោះទេ បើលោកមើលឃើញលុយជាធំលោកនៅបន្តដឹកនាំ Real Madrid បាត់ទៅហើយពីព្រោះលោកនៅសល់កិច្ចសន្យា៣ឆ្នាំទៀតនៅទីនោះហើយប្រាក់ខែក៏ច្រើនជាងនៅទីនេះដែរ។ លើសពីនេះ វាក៏មិនមែនដោយសារការងារនៅទីនេះស្រួល ឬក៏ពីព្រោះតែក្រុមមានកីឡាករល្អគ្រប់គ្រាន់សម្រាប់ប្រជែងជើងឯកដែរ។ តាមពិតទៅ ស្ថានភាពរបស់ក្រុម Chelsea បច្ចុប្បន្នគឺអន់ជាងគេបំផុតក្នុងអាជីព៦ឆ្នាំចុងក្រោយរបស់លោក ប៉ុន្តែហេតុផលពិតប្រាកដនៅក្រោយការសម្រេចចិត្តរបស់លោកគឺពីព្រោះលោកស្រលាញ់ក្លិបតោខៀវនិងស្រលាញ់គម្រោង(project)របស់ក្លិប។
យ៉ាងណាមិញ លោក Mourinho មិនធ្លាប់នៅដឹកនាំក្រុមណាមួយពេញរយៈពេល៤រដូវកាលនៅឡើយទេក្នុងអាជីពដឹកនាំដ៏ជោគជ័យរបស់លោកដែលឈ្នះជើងឯកលីក៧លើក (Primeira Liga ២ដង Premier League ២ដង Serie A ២ដង និង La Liga ១ដង) ពានរង្វាន់ UEFA Champions League ២ដង UEFA Cup ម្ដង និង Cup ជាច្រើនផ្សេងទៀត។ អតីតជំនួយការរបស់លោក Louis van Gaal នៅក្លិប Barcelona អំឡុងឆ្នាំ១៩៩៦ដល់២០០០រូបនេះចាកចេញពី FC Porto មកកាន់តំណែងនៅ Chelsea បន្ទាប់ពីដឹកនាំក្រុមរបស់ព័រទុយហ្គាល់ពីររដូវកាល ពោលគឺបន្ទាប់ពីលោកនាំក្រុម Porto លើកពាន UEFA Champions League ក្នុងឆ្នាំ២០០៤។
អត្ថបទ៖ Sunderland ទម្លាក់ Chelsea ឯ Man City ទម្លាក់ Leicester ឡើងវគ្គ១/២ League Cup
ប៉ុន្តែនៅដើមរដូវកាលទី៤របស់ខ្លួននៅក្រុមនៃភាគនិរតីទីក្រុងឡុងដុង ពោលគឺក្នុងខែកញ្ញាឆ្នាំ២០០៧ អតីតអ្នកបកប្រែរបស់លោក Sir Bobby Robson ម្នាក់នេះចាកចេញពី Chelsea ក្រោមការព្រមព្រៀងទាំងសងខាង បន្ទាប់ពីមានជម្លោះជាមួយម្ចាស់ក្លិប Roman Abramovich។ នៅឆ្នាំ២០០៨ លោកទៅដឹកនាំក្រុម Inter Milan ហើយលើកពាន៥នៅទីនោះក្នុងរយៈពេលត្រឹមតែ២រដូវកាល រួចក៏ផ្លាស់ទៅដឹកនាំក្រុម Real Madrid នៅអេស្ប៉ាញក្នុងឆ្នាំ២០១០។ តែបន្ទាប់ពីដឹកនាំ Real Madrid ឱ្យឈ្នះជើងឯក La Liga ម្ដង Copa del Rey ម្ដងនិងឡើងដល់វគ្គ៤ក្រុមចុងក្រោយនៅ Champions League ពីរដងជាប់គ្នាលោកក៏សម្រេចចិត្តចាកចេញពី Santiago Bernabeu ដោយគ្មានអ្នកណាបណ្ដេញ ដើម្បីត្រលប់មកដឹកនាំ Chelsea ជាទីដែលអ្នកគាំទ្រជាច្រើននៅតែគោរពស្រលាញ់និងចង់ឱ្យលោកវិលទៅកាន់តំណែងសាជាថ្មីឡើងវិញដោយសារតែស្នាដៃដឹកនាំ Chelsea ឱ្យឈ្នះជើងឯកលីកកំពូលអង់គ្លេសជាលើកដំបូងក្នុងរយៈពេល៥០ឆ្នាំកាលពីឆ្នាំ២០០៥៕
ប្រភពពីៈhttp://news.sabay.com.kh
Posted in 
.jpg)
0 comments:
Post a Comment