RSS Feed
Twitter
Monday, December 23, 2013
Unknown
ប្រភពពីៈhttp://news.sabay.com.kh រមណីយដ្ឋានភ្នំប្រសិទ្ធិ៍ កាលពីថ្ងៃអាទិត្យចុងសប្ដាហ៍មុន ដែលត្រូវនឹងថ្ងៃកាន់បិណ្ឌទី៣ បានស្រូបភ្ញៀវទេសចរ រាប់រយរាប់ពាន់នាក់ ខណៈប្រជាជនបានទៅទស្សនាផង និងធ្វើបុណ្យដាក់បិណ្ឌផង។ ភ្នំប្រសិទ្ធិ៍ និងភ្នំរាប មានចម្ងាយ ២៤ គ.ម ពីភ្នំពេញ បើគិតពីតាខ្មៅ គឺ ៣៥គ.ម។
ភ្នំប្រសិទ្ធិ៍ស្ថិតនៅមួយចំណែកក្នុងឃុំម្កាក់ ស្រុកអង្គស្នួល និងមួយចំណែកទៀតក្នុងឃុំឈ្វាំង ស្រុកពញាឭ ខេត្តកណ្ដាល។ ផ្លូវដែលគេនិយមធ្វើដំណើរទៅកាន់រមណីយដ្ឋានភ្នំប្រសិទ្ធិ៍ និងភ្នំរាបនេះ គឺទៅតាមផ្លូវជាតិលេខ៥ តែដល់ចំណុចផ្សារព្រែកព្នៅ គ.ម លេខ១១ មានផ្លូវបំបែកចូលខាងឆ្វេងដៃ ចម្ងាយ ១៣ គ.ម។ តើហេតុអ្វីបានជាភ្ញៀវទេសចរនិយមចូលចិត្តទៅលេងភ្នំរាប និងប្រសិទ្ធិ៍នេះ?
មិនមែនជារឿងចៃដន្យនោះទេ ដែលប្រជាជនសម្រុកនាំគ្នាទៅលេងរមណីយដ្ឋានភ្នំប្រសិទ្ធិ និងភ្នំរាប ដោយសាររមណីយដ្ឋាននេះ ជាតំបន់កម្សាន្តបែបធម្មជាតិផង ប្រវត្តិសាស្រ្ត និងកែច្នៃផង។ ទន្ទឹមគ្នានេះ ស្របពេលដែលពិធីកាន់បិណ្ឌដែលប្រជាជនទៅធ្វើបុណ្យដាក់បិណ្ឌនៅតាមទីវត្តអារ៉ាមនានាតាមបណ្ដោយផ្លូវទៅកាន់តំបន់ទេសចរណ៍នេះ ហើយហួសទៅកាន់ភ្នំប្រសិទ្ធិ៍ ឬភ្នំរាប ដែលនៅភ្នំរាបមានកន្លែងអង្គុយលេងផង និងមានអាហារញុំាជាច្រើននៅក្បែរប្រាសាទនោះ។
“ខ្ញុំទៅធ្វើបុណ្យដាក់បិណ្ឌទេ តែក៏ហួសទៅលេងនៅទីនោះទៅ ព្រោះថា តំបន់នេះមិននៅឆ្ងាយពីភ្នំពេញទេ គឺយើងជិះមួយវឹងដល់ហើយ”។ នេះជាការលើកឡើងរបស់យុវតី សុនាថ។ សុនាថ ស្ថិតនៅក្នុងសំលៀកបំពាក់អាវប៉ាក់ស សំពតធ្វើពីសូត្រ បាននិយាយថា “ខ្ញុំមកទីនេះមានគ្នាបួននាក់ គឺសុទ្ធសឹងតែជាមិត្តរួមថ្នាក់ទេ ថ្ងៃនេះជាថ្ងៃអាទិត្យ ពេលសម្រាកអីចឹងខ្ញុំក៏ណាត់គ្នាមកលេងទីនេះទៅ”។ធ្វើដំណើរតាមរយៈរថយន្ដ Lexus អ្នកស្រី ស៊ីណាត វ័យ៥៦ឆ្នាំ រស់នៅរាជធានីភ្នំពេញ ដែលបានទៅលេងរមណីយដ្ឋានភ្នំរាបជាមួយក្រុមគ្រួសារ បាននិយាយថា “ចេញពីវត្តក៏នាំគ្នាមកទីនេះ តែម្ដងទៅ ហើយបានមើលប្រាសាទផង និងញុំាអាហារនៅតាមតូប ដូចជាយើងទិញមាន់ ត្រីអាំង និងសម្លរស្ងោរ ដែលយើងកុម្ម៉ង់ម្ចាស់តូបគឺនឹងលើកយកមកអោយហើយ។ តែមាន់ហាក់ថ្លៃជាងថ្ងៃធម្មតាបន្ដិច គឺមាន់មួយ៣ម៉ឺនរៀល ដែលថ្ងៃធម្មតាអីមិនដល់នឹងទេ តែធ្វើម៉េចបើថ្ងៃនេះជាថ្ងៃបុណ្យទានអីចឹងទៅហើយ បើមិនញុំាមិនកើត”។
អ្នកលក់មាន់ម្នាក់ដែលមិនមានតូបទេ ហើយកំពុងឈរចៀនមាន់នៅខាងត្បូងប្រាសាទវិហារសួគ៌បាននិយាយថា “ថ្ងៃនេះខ្ញុំលក់មាន់ដាច់ខុសពីថ្ងៃធម្មតា ព្រោះថា ថ្ងៃនេះជាថ្ងៃអាទិត្យផង និងជាថ្ងៃកាន់បិណ្ឌទី៣ទៀត ដូច្នេះហើយភ្ញៀវមកលេងច្រើន គិតត្រឹមម៉ោង១២ថ្ងៃត្រង់នេះ ខ្ញុំលក់មាន់អស់៣០ហើយ”។
អ្នកនាង នឹម ដែលជាអ្នកលក់មាន់រូបនេះបន្តថា “ខ្ញុំលក់មាន់គឺមិនបានថ្លៃដូចម្ចាស់តូបគេទេ គឺខ្ញុំលក់មួយតែ២ម៉ឺន ឬ២៥០០០រៀលប៉ុណ្ណោះ ព្រោះអីយើងអត់មានតូបឲ្យគេអង្គុយ ដូច្នេះអ្នកទិញគាត់ត្រូវជួលតូបទៀត ហើយអ្នកមានតូបគេអត់គិតលុយថ្លៃតូបទេ តែគេគិតជាមួយម្ហូបរួចជាស្រេចហើយ”។
គួរបញ្ជាក់ដែរថា ភ្នំប្រសិទ្ធិ៍គឺមានភ្នំពីរ ដែលនៅទន្ទឹមគ្នាខ័ណ្ឌដោយជ្រលងភ្នំនៅខេត្តកណ្ដាល និងម្ខាងទៀតនៅខេត្តកំពង់ស្ពឺ។ ក្នុងចំណោមភ្នំទាំងពីរនេះ ភ្នំខាងលិចមិនសូវមានប្រវត្តិរឿងទេ។ ចំណែកភ្នំខាងកើតវិញគឺមានរឿងរ៉ាវទាក់ទងនឹងប្រវត្តិសាស្ត្រក្នុងរឿងសាសនាច្រើន ដែលមានរូបសំណាកព្រះចូលនិព្វានមួយយ៉ាងធំ និងរឿងរ៉ាវទាក់ទងទៅនឹងពង្សាវតារប្រវត្តិស្ដេចខ្មែរ។ នៅភ្នំប្រសិទ្ធិ៍នេះ ក៏មាននៅសល់ប្រាសាទបុរាណមួយមុនសម័យអង្គរផងដែរ។
នៅចម្ងាយប្រមាណជា ១ គ.ម ពីភ្នំប្រសិទ្ធិ៍ មានរមណីយដ្ឋានកែច្នៃមួយទៀតមានឈ្មោះថា ភ្នំរាបឬប្រាសាទវិហារសួគ៌ ដែលកសាងនៅឆ្នាំ ១៩៩៦-១៩៩៨ ធ្វើអំពីថ្ម និង ស៊ីម៉ងតិ៍ ដែលផ្ដួចផ្ដើមដោយលោករស់ សារិន បានប្រមូលថវិកាពីសប្បុរសជនក្នុង និងក្រៅប្រទេសសម្រាប់កសាងចំនួន១លានដុល្លារសហរដ្ឋអាមេរិក តាមរចនាបថអង្គរ (គេនិយមហៅថា សំណង់ អង្គរវត្តថ្មី)។ បច្ចុប្បន្នប្រាសាទវិហារសួគ៌ត្រូវបានទេសចរជាតិ និងអន្តរជាតិទៅទស្សនាកម្សាន្ដជាច្រើន ជាពិសេសការថតរឿងបុរាណខ្មែរ៕
Posted in 
.jpg)
0 comments:
Post a Comment